DER   SCHUHSCHRANK.

Bei uns daham is des su :  Die ganzn Schuh stenga in der Diele umanander.

                                             Von der ganzn Familie.

Ich persönlich hob ja gor net su viel., wal mehr als zwaa konnst eh net braung. Ober mei Fraa und die Kinner, die hamm su viel, do konnst mana a jeder hot zehn Haxen.

Des schaut net gut aus, die Diele voller Schuh. Und es is a wecher dem Duft. Manchmol dampfts ganz schee.

Undfür mich is die Diele die Visitnkartn von am Haus. Wenn do a Besuch kimmt und siggt den den Verhau in der Diele, der denkt sich:  Des muß a Saustoll sa, wenns in der Diele scho su ausschaut.

Also hob ich mir gedocht, mir braung an Schuschronk!

Ich hob dann an kaaft, an gutn. Echt Spanplattn mit original Kunststoff furniert. Zum selber zammbaua, wal des konn jeder Depp. Also muß ichs a kenna.

Ich hob die drumm Schochtl hamgschafft und hobs dann ausgepackt. A haufn Zeich wor do drinna :

Bretter, Schraum, Dübl, Nägl und ganz untn a Gebrauchsonleitung. Die is fürs Zammbaua unentbehrlich.

Obn is drübergschandn "  Made in Korea  " . 

Oläg, a koreanischer Schuhschronk ! Do hob ich gschaut. Mit dem hob ich net grechnt. Ober etzt is scho Wurscht. Kaaft is kaaft. Schau mer halt amol.

Die Gebrauchsonleitung wor koreanisch gschriem. Lauter Strich und Punkte, überhaupt ka normoler Buch-

stom. Ober Gottseidank wors mehrsprachig und als sechste Sproch hob ich Deitsch gfunna.

Oganga is also :  Du gekaufen Schranken Schuh, wir kradulieren Dich dazu ! 

Noja, zwor net ganz fehlerfrei , ober immerhin deitsch. Daß die gleich per du mit mir senn. Ich kenn in Korea keinen  Menschn. Is ja Wurscht, zuerst amol nochschaua ob alles do is. Wal wenn a Drumm fehlt, host beim Zammbaua keine Chance.

" Zwei Bretten für jeden Seiten ". Des senn praktisch die Seitnbreter.  " Ein Ruckenwand mit Loch geboren " 

des is die Rückwänd mit am vorgebohrtn Loch. Zu gebohrt song die geboren.  Wahnsinn !

Mei wie sollns des a wissn, in Korea. Dann senn nuch fünf Einlegebretter drinna gwesn, die ham in der 

Beschreibung " 5 Bretten zum parken Schuh " ghaasn. Eigentlich logisch. Do parkt mer praktisch seina Schuh.

Mensch !  Hoffentlich passn do meina Schuh nei, ich hob Schuhgröße 44 und die Koreaner hamm doch su klana Fieß ? Des wass mer doch vom Fernseh. Ober jetzt hob ich scho mein Schranken Schuh , jetzt hilft alles nix.

Also weiter giehts:  10 mal Glied von Eisen ist Scharnierung, des senn 10 Scharniere, 18 Dubels senn 18

Dübel, 20 Schrauben senn 20 Schraum und versieden Stiften Stahl senn a Haufn Nägl. Auf zerletzt is nuch dortgstandn " 1 Wunt " . Wos des is was ich bis heit net.

Also Materiol is do, jetzt giehts ons Zammbaua. Schau mer in die Montageonleitung.   Als erstes nehmen wir zur Hand Bretten für den Seitenwand. Des reimt sich sogor. Und dir zwaa Seithbreter ham sogor an Noma kappt:  " Bretten a und Bretten B ". Und wos muß ich mit den Bretern do ? Wir verbinden Bretten A und Bretten B mit Fixierungsbretten ? Wos für Fixierungsbretten ? Von an Fixierungsbretten hob ich nix glesn.

Ich wollt scho meiner Fraa schreia, do hob ich Gottseidank weiterglesn:  Als Fixierungsbretten wir nehmen Bretten zum parken Schuhen.  Aha , a Einlegebret muß ich do hernehma. Und wie fixier ich des ?

" Mit Schrauben jeder Seiten zwei ".    Genau, auf jeder Seitn zwaa Schraum.   Ober wie soll des geh?

Mit der linkn Händ soll ich des Bretla A haltn, mit der rechtn Bretla B . Und mit wos soll ich schraum ?

Ich hob blus zwaa Händ. Vielleicht hamms in Kores vier ?  Hülft nix, ich brauch mei Fraa.  Häj du ! Kumm her, du mußt mer helfn.  Ich konn net, ich back an Kung! Schreits aus der Küchn raus.

Des is typisch! Ich zerbrich mir ner Kupf, daß unser verhaude Diele schenner werd, und sie? sie backt an Kung. Wohrscheinlich kummt wieder a Freindin zum Ratschn, und nochert saufns an Liter Kaffee und mampfn an Steer Kung nei. Typisch.

" Du mußt kumma, ich schaffs net allans " !  Nochert is doch raus aus der Küchn. " Do schau her" hob ich gsocht. " Ich muß die zwaa Bretla haltn und du mußt des Fixierbretla noschraum ".

" Legs hi, nochert gehts, Bledl"! Hods gsocht und is wider naus in die Küchn.

Es ärgert mich scho, wenns Bledl zu mir socht,ober nuch mehra ärgerts mich, wenn sa recht hot. Do kennt ich narrisch wern. Die schaut amol hie, nochert was sa wies gieht. Ich konn zwamol hieschaua und was es

immer nuch net. Des is zum Verzweifln. Ober des is jetzt Wurscht, ich muß weider zammbaua.

Ich leg die zwaa Bretten Seiten hie, und des fixiern gieht einwondfrei. Bis ich schau, hob ich alle fünf Ein-

lagebreter nogschraubt. Jetzt schaut des Ganze scho aweng aus wie a Schranken Schuh. Wos kummt als nächstes ?

Wir fügen ein die Ruckenwand in Schlitz, welcher vorgefräset.  Aha ...  die Rückwänd in den Schlitz nei !

Die Rückwänd is do, ober wu is der Schlitz ? Ich find ums Verreckn kann Schlitz. Wos soll ich jetzt do ?

Ohne Schlitz ? Des is typisch . Do renners in Korea alle mit Schlitzaugn umananner , ober wenns drauf okimmt, vergessn sa an Schlitz.   Obwohl wenn ich su nochdenk :  Eigentlich brauch ich gor kann Schlitz.

Ich nogl die Rückwänd einfoch hintn no, nochert hälts a. Nägl senn ja an Haufn do. Und außerdem sicht des kein Mensch, ob des gnoglt is oder ob do a Schlitz do is, wal die Rückwänd is eh hintn.

Ich hob dann die Rückwänd ognoglt wie der Teifl, mit mindestens 25 Nägl. Die hält ewich.

So etzt hob ich nuch an Haufn Zeich. Zum Beispiel - zehn mol Glied von Eisen ist Scharnierung .  Wos mach ich mit denern Scharniere ? Halt do stiehts :

Es ist ein Loch geboren, du stecken Glied hinein.  Wahnsinn !  Wie sich des onhört. Direkt ordinär ! Jamei, wie will der Koreaner, der des gschriem hot wissn, daß sich des in Deitschlandsu brutol onhört. Ich ho direkt lachn müssn.

Ober des Lachn is mir dann gleich verganga. Es wor nehmlich kein Loch geboren. Nicht aans. Des gibts doch net, wu senn die Löcher ? Ich hob zehn Glieder und kein Loch. Do stiehst fei ganz schee dumm do, su ganz ohne Loch.    Auf amol siech ich sa:  Die Löcher senn außn an die Bretter dro. Ja wos soll etzert des ?

Ich konn doch die Scharnierla net außn nomachn. Des is typisch Korea. Die Löcher außn. Und do gibs Leit, die kaafn koreanische Auto. Do is des Lenkrod im Kofferraum drinna. 

" He Fraa, kum her! Des mußt du dir unbedingt oschaua "! hob ich gschriea. Sie is mit die Händ voller Tach aus der Küchn raus.  " Do schau her, " hob ich gsocht, " wos die für a Glump hersteln. Die Löcher für die Scharnierla außn!"

" DReh die Bretla rum, nochert senns inns, du Bledl !"  hots gsocht und wor scho wider in der Küchn. 

Des Weib macht mich noch narrisch. Die hot nehmlich scho wieder recht. Die schaut hie und sichts. Ich wenn hieschau ich siegs net.

Ich hob tatsächlich die Bretten Seiten verkehrt umgedreht, drum senn die Löcher außn. Wos soll ich jetzt machn ? Ich hob praktisch alles scho    fixiert. Und wie ! Ich breng a die Rückwänd nimmer runter, aso hob ich die nognoglt. Und bluß wall ich kan Schlitz gfunna hob.

Aprobo Schlitz:  der wor scho do. Ober net obn, sondern untn, weil ich die Bretten verdreht hob.

Wist ihr wos ich gmacht hob ? Zammghaut hob ich des ganze Glump. Nochert hammer halt kann Schranken Schuh. Is bisher a ohne ganga. Net amol gscheit gebrennt hot er.

Und überhabbt:  Wem unner Diele net gfällt, der soll draußn bleim  !!

 

 

                                                         Ausgesucht von Heinz Zahn.